قال السودانيون الشعر في العديد من أمور الحياة مثل الحب والغزل وحب الوطن، كذلك قالوا الشعر المضحك الذي يبث الفكاهة بين الأصدقاء، ويوجد لهم العديد من الاشعار التي تثير الضحك، وفي هذا المقال أخترنا لكم بعض من أشعار الغزل المضحكة التي كتبت باللهجة السودانية.
قصيدة غزل سوداني في لبنانية
النت ده حاجة عجيبة خالص..تعرفت فيها على بنت..
راسلتها في الميل..
وبدى قلبي ليها يميل..
غابت عني أيام وليالي..
دورت عليه في كل مكان..
دورة عليها في ( غوغل ) و ( ياهو )..
وكتبت يا ناس ياهو..
حبيبي تايه وين القاهو..
ولا حد رد عليا..
نصحوني ناس الخبرات..
قالو لي دور عليه في الشات..
الشات ده مليان بنات من كل الألوان والجنسيات..
دخلت الشات.. ودورت من بين القنوات..
دورت نكهه من بين النكهات..
كلمت لي زول من اليابان..
خبير في الكمبيوترات فنان..
قلتا ليهو هاو آر يو..
قال لي شنق بنق فاين ثانكيو..
قلتا ليهو أنا من السودان..
مشتاق لحبيبتي ولهان..
وده النك نيم ليها..
دلني عليها يا زول..
أخذ مني الزول النك..
وقعد يتك تك تك تك..
لحد مالقاها..
قالي شنق يق يق يو..
تلاقيها في الآيسيكيو..
دخلت ليها في الآيسيكيو..
ولقيت حبيبتي الي ضيعتو..
وبكل لهفة وشوق كلمتو..
قالت لي بدك شو..
قلت ليها أنتي البنت اللي أدور عليه من زمان..
قالت لي أنتا من أيا مكان..
قلت ليها أنا من السودان..
ورأسي مثل الرمان..
وكرشي شوي مليان..
ولوني أفتح من الخنفسان..
قالت لي شو أفتح من الخنفسان..
ما معئولة هيك إنسان..
أنا بدي رجل فهمان..
أبظاي متل السوبر مان..
ولونه أبيض فتحان..
ما في منو في البلدان..
ولأني حلوة من لبنان..
وبمشي متل الغزلان..
وطرفي حلو ونعسان..
ووجهي ينور متل الشمع دان..
ما بأبل أتجوز من السودان..
ولا أفريقيا ولا بلوشتان..
بدي واحد فتحان..
أبيض متل الأسنان..
ممكن يكون من لبنان..
وإلا من شرق أوربا..
وإلا حتى كردستان..
لأني حلوي وبيضة من هذول أخلف صبيان..
الزول يقرى الكلام وهو زعلان..
جالو إكتئاب وصار تعبان..
كره حياته وصار ندمان..
ترك النت وهو غضبان..
وراح يدور على عروسة سمره..
من كسلا وأم درمان..
قصيدة بت هندسة
انا راسي جاط ما بين هواك والدبرسة
ألفت عشرين ألف بيت سبعين قصيدة مؤسسة
عشان الفت انتباها ومرة اقدر احسسا
يا حلوة يابت هندسة
يا حلوة يا زينة البنات يا نجمة الليل والميسا
انا في هواك بقيت فتات ودخلت عشرين مدرسة
في كلمات هواك بعبكي قاعد أتنفسا
يا حلوة يا بت هندسة
أكان شفتي يا بت هندسة
خطواتي دايماً بالغلط وأموري ديمة معكسة
يوم داك مساهر في الهدوم وكويتا جت عشان ألبسة
لقيتا الصباح حقت أخوي وهدومي قاعدة مكرفسة
لكن هواك اعمله ايه
دشدش عظامي وهرسه
داير ليا فرصة أكون قريب.. حبكة قليبك افللتتا
عشان تشوفي في هواك بهدل عضامي وهرسه
كلمات ليكي اتبشت ما زي زمان مهندسة
حتى الشعر الكان زمان كلماتو حلوة ملمسة
حين أتلخم كيف بقى كده.. ما فيه كلمة هندسة
وانتي السبب.. وانتي السبب في كل ده يا أ حلى أسباب الأسى
أنا ياخ بريدك.. اعمل إيه.. وريني يا بت هندسة
امشي وكوريك في الزلط يا ناس بريد بت
هندسة يا ناس بريط بت هندسة
كم مرة كم مرة قلت أقوم اقعد معاها واحدثها
لكن ما بقدر عديل ما اقدر انضم أونسا
خليها من اشرح حالي وحبي ليك والدبرسة..
ويا هناية داير أقوليك كلام اصلو السكوت فيو وسوسه
انا يا ملاك انا بعشقك وما اظن بلاك ارجا المسا
دايرك تكوني لي حبيبه وابقى ليكي حبيب قسا
اكسيك هواي وتلبسيني نعيم هواك اجمل كسا
ويا ربي كل عاشق نبيل تديهو زي بت هندسه
وترعاها من عين الحسود ومن توب جمالك لبسه
ويا ربي تحفظا لي براي ويا ربي تحفظا تحرسه
قصيدة ندى
قلتي لي سموك ندى
وده منو السماك ندى
ده أكيد أبوك
إنعل ابو كدة
فيك شنو يسمك ندى
في صوتك أتخن مننا
إضنين كبار زي دشنا
وتقولي لي سماك ندى
خشمك ده ريحتو معفنة
ايدين كبار حقات بنى
وتقولي لي سماك ندى
المشية كتاحة وعلاله وكده
كرشك تقول شايل جنى
وتقولي لي سماك ندى
قالت لي: اهو دى في البطاقة إسمي ندى
شوف يا أخ
ما فيش علاقة بينك وبين ندى
خليها ندى
خالت، قريبة، جارت صديقة ناس ندى
ما فيش علاقة
ندى في العيون الكحل مقعد ومسودة
انتي العيون فوقن قضى
ندى في الحواجب زي هلال
قصة نصوم دي مؤكدة
انتي الحواجب دلجة بس
قلم الحواجب هاردها
وتقولي لي سماك ندى
ندى تبتسم الالاف مؤلفة تسعدها
وانتي الخشم كوم التلاليش
بس طبق ومغطي صينية الغدا
ندى في الوشيش نظرك بشيش
ما يعقده
وانتي الوشيش وش الجحيش
نخرين كبار كرعين ردا
وتقولي سماك ندى
قالتلي: اي أنا إسمي ندى
شوفي أوعك تقولي اسمك ندى
ندى ما بس الاسم
ندى الجمال زايد الأدب زايد العلم زايد الفهم
ندى في الجمال ما شفنا أجمل من كده
ندى في الدلال خصاها بيهو رب العباد حين أوجدا
ندى في الأدب ربوها بيهو رجال ياكلو النار مولعة موقدة
ندى في الكلام طبيعي صوتا بيجيب صدى
ندى في البزاغ شربتي “سفن أب” ياهو ده
وتقولي لي سماك ندى إخص على كده