شعر حب خليجي من قصيدة بحور الشوق
اسبح بحور الشوق من دون ميداف
مع نخبة الشعار في عالي النوف
واهدي زهور الحب للناس لشراف
اللي لهم منهج موثق ومعروف
من العصور السالفه الوقت لي طاف
حب وغرام وعشق ما يحكم انصوف
وانا تبلاني هوى ريم الارياف
لي مجدله من فوق رداف منسوف
القلب غيره شخص فالحب ما ضاف
والعين ترفظ غيره مولاف ما تشوف
والشوق يا اهل الشوق جبار تلاف
يدعي قوي الحال با هات وحسوف
والحب جروحه مالها طب عراف
بلسم دواها وطبها زين لوصوف
ومتابع الزينات حلوات الاوصاف
منهن طعين القلب بارماح وسيوف
تمت وارجو العذر في طلسم القاف
وصلاة ربي . ع. النبي عد لحروف
اسبح بحور الشوق من دون ميداف
مع نخبة الشعار في عالي النوف
اقرأ أيضًا: شعر عن العيون
شعر حب خليجي من قصيدة لا يطول غيابك
يقول: خالد الفيصل
لا يطول غيابك ثم اخذ عليه
لو تخليت عنى عنك قلبي ما تخلى
العذر والتعلل والحكي ما نبيه
من تحرك فؤاده بالهوى ما تخلى
طبعي الصبر لكن وش عليه ارتجيه
من طويل الصبر يعقوب وأيوب ملا
دامني حي عطني وش بقي نحتريه
ما بي دموعك اللي عقب موتي تهلا
ما بقي بالعمر مقدر ما راح فيه
كل ما زل يومٍ يوم بالعمر ولى
ما يعرف الجمر مثل الذي يكتويه
احد يدفا بناره واحد فيه يتصلى
يا من القلب حطيته براحته يديه
ما رضى له مكان غير كفك محلا
كم تعذر وعيا عن هوى مهتويه
لين طاح بيمينك بالغرام وتجلى
شعر حب خليجي من قصيدة وتقول احبك
يقول: ناصر الوبير
وتقول احبك..؟ يا خي تكفى عشاني!
لا تقول شي اكبر من إحساسك، شفيك؟
تعبت اشيلك، ( بالضلوع ) المحاني!
تعبت من هذا الحزن.. وين اوديك؟
طبيعي اسكت واخلق احساس ثاني
هزمتني.. لين ( انكسر ) قلب يغليك!
أحب فيك آحساسك الأولاني
يوم اهتمامك بالعلاقة محليك
تدري متى اشعر باني ذاك الاناني؟
لا شفتهم عندي ( يجيبون ) طاريك!
اسكت.. ولا آسولف لهم عن حناني
ماودي حتى بالحكي نشترك فيك!
حب من ( طرف واحد ) لو انه كفاني
ما كانت جروحي بصدري تناديك!
ابسط حقوقي.. بالغلا و الأماني!
اني ( ليا حسّيت بالفقد الاقيك )!
تدري غيابك بالعمر وش عطاني؟
صبر ًجميل، ودمعتين ً تناديك؟
وتقول ليش افارقك، في زماني؟
وتقول ليش أزعل وافارق واخليك؟
بالله تكفى.. حط نفسك مكاني!
تقدر تحب إنسان مايفتكر فيك؟
اقرأ أيضًا: أجمل أشعار الغزل البدوي.
شعر حب خليجي من قصيدة آخر الحب
يقول: طلال الرشيد
كنت أحسب إني عرفت الحب قبل أعرفك
وعشقت قبل أعشقك واشتقت قبل ألتقيك
وكنت أحسب إني لقيت أحباب قبل أوصلك
وأثري توهمت في غيرك وأنا كنت أبيك
تعال نعطش وتشربني وأنا أشربك
تعال قبل الوعد أجلس معي محتريك
تعال شفني وأنا أستناك كم أشبهك
يطري علي ألف راي وراي وأحتار فيك
أجي مكان الوعد وإلا أسبقه أنطرك
وإلا آخذ الموعد اللي يحتريك وأجيك
يا آخر الحب ذقت الحب في أولك
يا أول الشوق أقصى الشوق ما ينتهيك
علمتني كيف أعرفك لين صرت أجهلك
ضيعتني في متاهاتك وكنت أرتجيك
حبيب الأحلام يا بعدك ويا مقربك
حرام يكفي تبعثرني وأنا أحتويك
إن شفتك بحلم صدقته وأنا أتوهمك
وإن شفتك بعلم كذبته إلين أنتشيك
أخاف أغمض عيوني وإن رمشت أفقدك
وأخاف أفتح وتصبح حلم ولا ألتقيك
شعر حب خليجي من قصيدة حبيبي نام يا عمري
حبيبي نام ياعمري على صدري وصارحني
وفض الصمت باحساسك وخل الحب لي يجري
وفضفض لي بعد عمري وعاتبني وفهمني
أنا أطري على بالك كثر ما أنته علي تطري
تعال أقرب من أحضاني ترى خدك مواعدني
يبي يلامس شغف روحي ويقطف بوحي من شعري
تعال أنثر هنا ليلك وخل ويلك يولعني
أنا أحبك وأبي قربك.. ترى مني قضى صبري
أنا نبضك زهر أرضك وأنت.. ايه تملكني
بنحل خصرك ..جمر ثغرك وزود بلونك الخمري
تتوهني.. تغرقني.. ومن بردك تدثرني
وتبكي لي وتشكي لي وله قلبك ومن سحري
أبي دموعك مع أنفاسك بصدق الود تحرقني
وأبي عطرك مع سحرك وآهك بالحشا تسري
أبي همسك يبعثرني غلا ولمسك يلملمني
وأبي عيونك من عيوني تذوب من الولع كثري
وأبي عهدك مع وعدك وأبي كلك تسلمني
أبي أيدك تسافر بي وزهر قدك يلحفني
وأهيم بعالمك عاشق جنوني أنت.. وانت بي تدري
تشوف الجمر بعيوني.. تشوف الشوق جنني
أجل تدري مثل ما أدري بأنك حلمي يابدري
حبيبي قوم وصارحني عن احساسك وعلّمني
أنا أطري على بالك.. كثر ما أنته علي تطري؟
شعر حب خليجي من قصيدة يا هبوب الورد والفلي
يقول: زايد بن سلطان آل نهيان
يا هبوب الورد والفلّي
مطلع قاصد من أدياري
مرحبا بك عدّ ما أنهلّي
ما لسّحب غيثٍ أو ما ياري
أو مرحبا مليون بالخلّي
الغضي لي له أنا أداري
لي حديثه إليه إيسلّي
أو من أشوفه أتزول الكداري
هو دواء للنّفس م العلّي
هو حياتي أو جنّتي أو ناري
الوزير أيصيح ويهلّي
دمع عينه سايل أو ياري
يشتكي من كامل الدّلّي
من وليفه لي خفي أو ذاري
عابرٍ في محمل إبشلّي
خاطف ابّناي ويماري
سنّةٍ واشراعه إمّلّي
مويته في برده إتباري
يا لخوي كأنك تبي الخلّي
جرّب البنّاي للجاري
واقصد المضنون وإدّلّي
خابرنّك فن في الدّاري
أولي شراتك نبه ما إيزلّي
لو ظلام اللّيل غدّاري
لي لفيته زاهي الحلّي
لي أيرحّب ليل وانهاري
با يرحّب بك أو بيهلّي
با إتحسّ ابراحت أفكاري
مثل ما انته كنت معتلّي
به وزا منّك أو لو أيداري
فرحتك با تفرح الكلّي
بينكن يا مانع أسراري
اقرأ أيضًا: أجمل أبيات شعر عن الحب.
شعر حب خليجي من قصيدة إلا الهوى
يقول: بدر بن عبد المحسن
أبعتذر.. عن كل شيء..
إلا الهوى.. ما للهوى عندي عذر..
أبعتذر.. عن أي شي..
إلا الجراح.. ما للجراح إلا الصبر..
إن ضايقك إني على بابك أكر..
ليلة ألم.. واني على دربك مشيت عمري وأنا
قلبي القدم..
أبعتذر.. أبعتذر.. كلي ندم..
عن كل شيء.. إلا الهوى..
ما للهوى عندي عذر..
أتصدقي.. ما خترت أنا أحبك..
ما أحد يحب اللي يبي..
سكنتي جروحي غصب..
يا حبي المر.. العذب..
ليت الهوى وأنتى.. كذب
كان أعتذر لك عن هواي..
وما أقول أنا كوني معاي..
إن ضايقك أني على بابك أمر..
ليلة ألم..
وإني على دربك مشيت عمري وأنا..
قلبي القدم..
أبعتذر.. أبعتذر.. كلي ندم..
عن كل شيء.. إلا الهوى..
ما للهوى عندي عذر..
الله كريم.. حبك.. يكون..
همي القديم..
وجرحى القديم..
والله عليم .. يا أحلي العيون..
إن الفراق.. جزا الفراق..
أبوعدك.. كان الطريق بيبعدك..
با مشي بطريق..
وكان الحجود بيسعدك..
ما لي رفيق..
أبجمع أوراق السنين.. وأودعك..
كان الفراق اللي تبين... الله معك
اقرأ أيضًا: شعر حب خليجي
شعر حب خليجي من قصيدة أحبك كثر ما قد صار
أحبك كثر ما قد صار احبك رغم ما قد ما صار
أحبك كثر ما دنيا الزعل والصد مهجورة
أحبك كثر ما تمطر بصدري من غلاك أمطار
أحبك كثر ما صارت أراضي العشق ممطوره
أحبك كثر ما تفتح شبابيك الربيع أزهار
أحبك كثر ما غنت عشان الصبح عصفوره
أحبك كثر ما تقف على جنب الطريق أشجار
أحبك كثر ما يقسى الشتاء وتهاجر طيوره
أحبك كثر ما في الأرض بنت تلفت الأنظار
أحبك كثر ما يرتاح عطر بصدر مغرورة
احبك كثر ما جاب المساء في معطفه زوار
احبك كثر ما جانا الصبح يشبهك نوره
احبك كثر ما تهدي كفوف الوصل من تذكار
احبك كثر ما شالت يدين العاشق زهوره
احبك كثر ما نقرأ عن الفارس عن المغوار
احبك كثر ما نسمع ولا شفنا ولا أسطوره
احبك كثر ما تلعب بدنيا العاشقين أقدار
احبك كثر ما.. ذا الحظ يلعن قصوره
احبك كثر ما عاثت رياح بحسبة البحار
احبك كثر ما البحار يعشق نسمة بحوره
احبك كثر ما يتحلف اللي منشغل بأعذار
احبك كثر ما في الناس ناس بجد معذورة
احبك كثر ما ملت قصايدنا من التكرار
احبك كثر ما الشاعر تمنى حب جمهوره
احبك كثر ما شفنا على وجه الزمن آثار
احبك كثر ما قلنا عن الأحوال مستورة
احبك كثر ما دارت بذهن الحالمين أفكار
احبك كثر ما في الخير ناس بالخير مذكورة
احبك كثر ما نرمى حكايات الحطب للنار
احبك كثر ما نسمع حكايات حب مشهورة
احبك كثر ما ضاق السجين بلعنة الأسوار
احبك كثر ما هاج البحر واجتاحته ثوره
احبك كثر ما ننسى واحبك كثر ما نحتار
احبك كثر ما يسهر محب وفي يده صوره
احبك كثر ما تقطع شفاتك في العسل مشوار
احبك كثر ما خدك يخلي الشمس مبهورة
احبك كثر ما روج عليك الحسن من أخبار
احبك كثر ما صدرك يدوخ الورد بعطوره
احبك كثر ما في عينك من السحر والأغوار
احبك كثر ما فيك الغلا ما وفت سطوره
احبك والزمن ساكن واحبك لو زماني دار
احبك يا مدينة حب وسط الصدر معمورة
احبك والتفت شاعر لعينك وانطرت أشعار
حلف ما يمسى الليلة قبل ما يكتب شعوره
ورتبتك بصدري وأنت تستاهل وراعي دار
تفضل قلب أوراق الغلا وأيديك مشكورة
وذكرتك وأنت لو مثلك ذكرته هلت الأنوار
وقمت أجمع من أشواقي قصائد عشق منثورة
تلبست الجمال وقلت ابهديك القصيد أزرار
غلاك وصدق حبك ما ترك لي نفس مكسورة
أنا عاشق جمال وما خفاني في الجمال أسرار
أنا لا من كتبت أعطيك وأعطي العشق بك دوره
كتبتك في القصيد أبيات من حسنك عليك تغار
حروف العشق طفلة في ثياب العيد مسرورة
لقيتك والدلع والثقل شله والحسن ثرثار
يقول أشياء كثيرة للعيون ويثبت حضوره
كفاية لو تطل ويفرح بطلتك دار وجار
كفاية لو تشوف الناس في نظرتك مأسورة
غرامك يغري حروف سقاها الصدق منك أمطار
كتاباتي بتشهد للغرام وتحفظ عصوره
احبك مهما ابتعد عني بسبة الأقدار
احبك واحبك لو حبي توصله لك طيوره
احبك رغم ما قد صار.. احبك حيل مهما صار
احبك دام أنا طيب.. وأراضي العشق ممطوره